Честитка од градоначалникот Стојаноски по повод Денот на македонската револуционерна борба

Во пресрет на 23 октомври – Денот на македонската револуционерна борба, градоначалникот Јован Стојаноски упати честитка до граѓаните на Охрид и Република Македонија.

„Кога пред 125 години Христо Татарчев, Дамјан Груев, Петар Поп Арсов, Иван Хаџи Николов, Антон Димитров и Христо Батанџиев во Солун, со јасна мисла, без доволно стратегија, но со нескриен жар и огромна верба, се заложиле за слободна Македонија, повеќе чувствувале одколку што знаеле, дека поставуваат ТЕМЕЛ И ВИЗИЈА за идните генерации. Нивните заложби и идеи ќе се материјализираат преку Илинден од 1903, НОБ од 1941 – 1945 и 8 септември од 1991 –та година, со заокружувањето на Македонската државна независност. Затоа, денес со посебен пиетет ги спомнуваме нашите херои и основоположниците на Македонската револуционерна борба. Нека им е вечна слава и честит и вековит да ни 23 Октомври“ – стои во честитката од градоначалникот Јован Стојаноски.