29/03/2024
Македонија

Едукативна програма за деца за безбедно користење интернет

Денеска, министерката за образование и наука проф. д-р. Рената Дескоска, придружена од извршниот директор на Вип, г-дин Мислав Галер, ја промовираа Vip едукативната програма за деца за безбедно користење на интернет, насловена “Интернетот не e само игра. Кликај безбедно…” .

Станува збор за едукативната и иновативна програма под името “Интернетот не e само игра. Кликај безбедно…” , која вработените на Вип преку интерактивни и интересни предавања прилагодени на возраста и образовната програма, ќе ги запознаваат учениците од 4-то одделение  и ќе го збогатуваат нивното знаење за Интернетот, како безбедно да бидат дел од светската мрежа, и притоа како да ги заштитат своите лични податоци.

img_8952.jpg

„Со оваа програма, Вип уште еднаш ја потврдува својата јасна определба да вложува во заедницата каде работи и живее, а со тоа да претставува пример во заедницата во која делува. Живееме во дигитален свет, мобилните телефони и пристапот до интернет се нашето секојдневие, но и секојдневието на нашите деца. Затоа, ја креиравме оваа програма со која се надеваме дека ќе придонесеме кон едукација на најмладите и ќе придонесеме кон нивна соодветна подготовка за иднината и дигиталниот свет, притоа обрнувајќи особено внимание за нивната безбедност“, изјави Мислав Галер, извршен директор на Вип.

„Градењето на партнерства помеѓу корпоративниот сектор и образованието е од особена важност за јакнење на капацитетите на образовниот процес и придонес кон креирање квалитетни образовни содржини, чиишто придобивки ги ползуваат младите генерации. Сигурна сум дека оваа програма ќе наиде на интерес кај децата и наставниците, но се надевам дека ќе го привлече и вниманието и на родителите како водечки воспитен фактор да ги подготват своите деца за предизвиците и можностите кои ги носи дигиталната ера. Децата се најголемите трагачи по знаење, секогаш љубопитни да дознаат повеќе информации, а е особено важно да бидат корисни и применливи за нивниот понатамошен развој“, изјави министерката Рената Дескоска.

img_20180219_112953.jpg

Проектот предвидува опфат на 700 ученици од четврто одделение во 10 основни училишта на територијата на Градот Скопје. Во првиот бран на активности кој ќе се спроведува во периодот од февруари до јуни 2018 година, ќе опфати повеќе од 700 четврто одделенци од 10 основни училишта на територијата на град Скопје и тоа ОУ „Гоце Делчев“, ОУ„11 Октомври“, ОУ„Коле Неделковски“, ОУ„Владо Тасевски”, “ОУ„Јоаким Крчовски“, ОУ„Вера Јоциќ“,  ОУ„Ацо Шопов”, ОУ “Васил Главинов“, ОУ„ Браќа Миладиновци“ и ОУ„Кузман Јосифовски -Питу“.

За време на предавањата ќе се применува и соодветна брошура, специјално изработена за оваа намена на македонски и албански јазик, која има и содржини за пополнување од страна на учениците, односно ќе се користи и како работна тетратка.

Проектот “Интернетот не е само игра. Кликај Безбедно” е дел од иницијативата “Интернет за сите” на Телеком Австрија Групацијата, која во Македонија започна во 2013 година со предавања за децата на вработените и нивните соученици на возраст од 9 до 12 години во просториите на Вип. Целта на оваа иницијатива е преку различни алатки, програми и тренинзи, учесниците да ги стекнат неопходните компетенции за нивно вклучување во општественото живеење во ерата на дигитализацијата.