28/03/2024
Македонија

Мицкоски: Македонија тоне во корупција, тоа мора да се смени

Интегрален текст од видео обраќање на Христијан Мицкоски, Претседател на ВМРО-ДПМНЕ

Почитувани,

„Општество во кое нема место за корупцијата“ беа зборовите кои ги ветуваа од владата. Но што добиваме: и официјално Република Македонија е означена како најкорумпирана држава во Европа.

За 9 месеци оваа влада нема превземено ниту еден единствен чекор за сузбивање на корупцијата која го разјадува општественото ткиво. Неефикасното и зависно судството останува рак рана, неефикасни институции, отсуство на професионалност во раководниот кадар на полицијата, исклучително корумпиран менаџмент во здравство,  како и широко распротранета корупција на институциите кои се во непосреден допир со граѓаните се само мал дел од големата слика за тоа каква држава сме денес. 

Исто така уште јавноста чека одговори од премиерот за тоа до каде е истрагата за корупцијата на двајцата членови од неговата влада која беше најавена. Најзагрижувачка е корупцијата на најниско ниво.

Македонија не смее да се претвори во место каде граѓаните за да стигнат до една обична услуга која природно им припаѓа, мора да потплатат. Потребна е решителност, независност, и волја да се сузбие оваа појава.

За ВМРО-ДПМНЕ, Македонија која има брз и ефикасен правосуден и полициски систем е цел која нема алтернатива. Граѓаните мора да се чувствуваат безбедно и правично.