Нов здравствен дом ќе добие Охрид
Нов здравствен дом изграден по највисоките светски стандарди ќе добие Охрид, ова беше истакнато на трибината што синоќа се одржа во големата општинска сала , а на која присуствуваа охридскиот градоначалник , Јован Стојаноски и министерот за здравство на Р. Македонија, Венко Филипче.
Домот треба да биде сместен во рамки на охридската Општа болница, а изработувачи на проектот се професорите Зорица Блажевска и Саша Тасиќ, од Архитектонски факултет од Скопје.
Објектот е составен од две блоковски структури, приземје и кат и приземје и два ката, од каде што излегува мала административна кула, потенцира професорката Блажевска за време на презентацијата.
„Проектирање на ваков објект е сложен процес затоа што има голем број на служби кои треба добро да се сместени, да имаат диференцирани пристапи и автономност на сите функционални групи. Во новиот современ здравствен дом ќе бидат сместени службата за итна медицинска помош, педијатри, примање инфузии, лабораторија, диспанзер за деца од предшколска и школска возраст, трудова медицина, служба за рендген, патронажна служба, како и концесионери стоматолози и детска стоматологија. Блоковските структури имаат средишно поставени атриуми со цел сите содржини во објектот да се природно вентилирани и осветлени. Двата објекти се поврзани хоризонтално со коридор, а вертикалната комуникација е со скали и лифт“, истакна Блажевска.
Целта на новиот Здравствен дом е пациентот да добие интергрирана услуга, односно сé да биде на едно место, истакна на презентацијата министерот за здравство, Венко Филипче.
„Проблеми во овој сектор има многу, со недостиг на кадар, доктори, медицинкси сестри, огромни долгови, заглавени инвестиции, судски спорови и друго. Па, сакаат како министерство преку дебати да слушнат од граѓаните какви се потребите за да се најде идеалното решение. Планот со новиот здравствен дом е нова форма која сакаме да ја имплементираме, а тоа е да дислоцираме амбуланта од едно на друго место бидејќи старата е нефункционална несоодветна“, подвлече Филипче според кој болниците во Охрид се одлични регионални центри кои нудат врвни услуги.
„Болниците во Охрид се одлични регионални центри. Таков е Заводот за кардиоваскуларни заболувања кој нуди врвни услуги за пациентите со докажан и признат кадар во Светот. Тоа е нешто што вреди да го усовршуваме и надополнуваме. Многу добри специјалисти во соодветната област има и специјалната болница за ортопедија и трауматологија „Св. Еразмо“. Навистина вреди да се инвестира и вложува во вакви институции“- подвлече министерот Филипче, и посочи дека ќе продолжи изградбата на новото крило во косната болница кое се гради по највисоки светски стандарди. Според Филипче во Охрид има одлични услови за развој на здравствен туризам и во иднина државата со поддршка на општинската власт активно ќе работи на создавање услови за развој на ваков тип туризам.
Заменик-градоначалникот Константин Георгиески на средбата откри дека овој проект произлегол како резултат на една неформална средба помеѓу министерот за здравство и градоначалникот Стојаноски пред неколку месеци.
„Тогаш, како реазултат на долгогодишната потреба за изградба на Здравствен дом во Охрид, почнавме да бараме решенија, првично преку некои стари проекти. Откривме еден проект кој веќе беше изработен и со голем ангажман успеавме да го приведеме при крај. Се надевам дека со сериозни заложби од Министерството, локалната самоуправа и министерот Филипче, ќе дојдеме до финална реализација“, истакна Георгиески.
Пред присутните се обрати и пратеничката Жаклина Лазаревска која додаде дека охриѓани веќе долг период бараат да се изгради еден современ Здравствен дом, односно Маларична, како што ја викаат.
„Тука тие треба да ги добијат потребните здравствени услуги. Охрид заслужува многу повеќе вакви проекти. Ќе ми биде задоволство ако се реализираат, а јас како пратеник секоја иницијатива ќе ја спроведувам и ќе се залагам преку сите инструменти кои ми се достапни, градот да го има потребното внимание при распределбата на буџетот“, потенцираше Лазаревска.
