Победа на Македонија за успешен старт на СП 2019

Македонија со победа го отвори Светското првенство во Олимписката сала во Минхен. Во првото коло, бодрена од над 200 навивачи, Македонија ја совлада селекцијата на Јапонија 38-29 (18-13) и ги запиша првите бодови.

Резултатски натпреварот беше израмнет само во првите десетина минути од средбата. Во тој период Јапонија успеа и да поведе 4-3, но потоа следеше серија од 4-0 на нашите ракометари со кои комплетно ја преземавме контролата врз натпреварот.

Дејан Манасков на почетокот постигна три гола, а потоа Кирил Лазаров ја презема улогата на главен голгетер. Македонија ги користеше умешно своите предности и нашите напаѓачи без поголеми паузи ја погодуваа мрежата на јапонскиот голман. На спротивната страна Ристовски имаше низа успешни интервенции по кои Македонија во 18-та минута водеше со 10-5.

По ова се играше резултатски поизрамнето, но разликата за македонскиот состав остана и се движеше меѓу три и пет гола, за на полувреме да имаме водство од 18-13.

Кирил Лазаров со седум гола беше најефикасниот во македонскиот тим во првото полувреме.

Во вториот дел се играше со истиот ритам. Јапонија се доближи на 18-21, но веднаш следеше серија на Македонија со која одново дојдовме со плус пет 24-19. На петнаесет минути до крајот водевме 27-21, потоа беше 29-23 и полека натпреварот одеше кон сигурна завршница.

На пет минути до крајот имавме водстов од 34-27 и остана и простор и за атракција. Конечно Македонија запиша победа од 38-29. Кирил Лазаров постигна осум гола, еден помалку постигна Дејан Манасков, а Борко Ристовски средбата ја заврши со 20 интервенции.

Следниот натпревар на Македонија е во недела, а противник е репрезентацијата на Бахреин, натпреварот ќе се одигра во 14:00 часот.