Промоција на книгата „Чудесните светови на Алиса“ од Мерсиха Исмајлоска

Мерсиха Исмајлоска, заедно со кафѐ и бар „Шила“, ве поканува на промоцијата на нејзината книга „Чудесните светови на Алиса“ во издание на „Вермилион“, која ги обработува книгите „Алиса во земјата на чудата“ и „Алиса во светот на огледалото“ од Луис Карол и нивните интерпретации во визуелните уметности и воопшто во културата.

Промоцијата почнува во време за чај, сабота во 5 часот попладне, на 17.02.2018, и е уште еден во низата квалитетни културни настани организирани во овој концептуален кафѐ -бар кој сѐ повеќе се истакнува како алтернативна арт сцена во Охрид.

Промотори на книгата се проф. д-р Лидија Капушевска Дракулевска и м-р Александра Јуруковска, а модератор на настанот ќе биде лично Лудиот Шапкар.

Мерсиха Исмајлоска е родена во Струга. Докторирала на Катедрата за општа и компаративна книжевност на Филолошкиот факултет „Блаже Конески“, а работи на Универзитетот „Св. Апостол Павле“ во Охрид. „Чудесните светови на Алиса“ е нејзина четврта книга.