Средба на министерот Спасовски со амбасадорот на Чешката Република

Министерот за внатрешни работи Оливер Спасовски денеска одржа работна средба со новоименуваниот амбасадор на Република Чешка Н.Е. Мирослав Томан.

Министерот Спасовски му посака успешна работа на амбасадорот Томан и изрази надеж дека ќе продолжи успешната соработка меѓу двете држави, а Република Македонија наскоро ќе направи прогрес во процесот за интеграција во Европската унија и НАТО.

Амбасадорот Томан потенцира дека Република Чешка ја поддржува Република Македонија и ќе настојува да се продлабочи соработката меѓу двете земји и особено меѓу двете министерства за внатрешни работи.

Министерот Спасовски се заблагодари за досегашната помош од Владата на Република Чешка, а на средбата беше договорено делегација на чешкото министерство за внатрешни работи да го посети македонското МВР и во комуникација со своите колеги да ги договорат конкретните начини на натамошна соработка.