29/03/2024
Охрид

ВМРО-ДПМНЕ: Градоначалникот се кити со туѓи перја, реконструкцијата на патот Косел-Вапила е проект на ВМРО-ДПМНЕ

ОК ВМРО-ДПМНЕ Охрид испрати соопштение до медиумите како реакција на известувањето на општина Охрид околу реконструкцијата на патот од Косел до Вапила.

„Крајно време е Јован Стојаноски конечно да почне нешто да работи. Наместо да ги реализира своите големи ветувања кон граѓаните на Охрид тој се кити со туѓи перја. Јован Стојаноски и неговите соработници лажат и брутално манипулираат кога велат дека од претходната Локална Самоуправа не наследиле ниеден проект. Денешниот проект почеток-реконструкцијата на локалниот пат од с. Косел до с. Вапила кој гордо го промовираат е комплетно завршен и оставен на Стојаноски со потпишан договор за изведба во времето на минатата Локална Самоуправа предводена од ВМРО-ДПМНЕ.

Имено, тогашната Влада предводена од ВМРО-ДПМНЕ успеа од Европската комисија во рамки на ИПА-фондот за рурални инвестиции за реконструкција и развој, преку Проектот за подобрување на општинските услуги МСИП да добие грант-средства преку кои овозможи општините во Република Македонија да ги користат за изградба на инфраструктура. Општина Охрид аплицираше на тој повик и доби средства за реконструкција на локалниот пат од с. Косел до с. Вапила. Повикот за понуди може да се види на следниот линк: http://ohrid.gov.mk/index.asp?PodatociID=6360, а целата постапка околу избор на изведувач беше завршена непосредно пред оддржување на локалните избори. Претходно, за потсетување Локалната Самоуправа предводена од градоначалникот Никола Бакрачески со силна поддршка од Владата на ВМРО-ДПМНЕ, ги реконструира патните правци: с. Вапила до с. Ливоишта и од с. Вапила до с. Сирула. Со реконструкцијата на овој патен правец од с. Косел до с. Вапила практично завршена е комплетната реконструкција на оваа делница благодарение на политиките на ВМРО-ДПМНЕ.

Оттука отворено го прашуваме Градоначалникот Стојаноски: Зошто ги остави цели шест месеци граѓаните на овој дел од општина Охрид да чекаат да се асфалтира патот? Дали можеби чекаше да се подзаборави тоа кој го замислил и довел до сама реализација овој проект?

Го повикуваме Стојаноски да престане со туристичките прошетки, да се врати во градот и да почне нешто да работи. Ќе биде интересна седницата на Совет во април кога Стојаноски треба да ги поднесе тримесечните извештаи за тоа што сработил. И во нив ќе се види тоа дека до сега сработил едно големо ништо и бесцелно го преседал мандатот!“– стои во соопштението.