Завршен првиот ден од работната посета на МНР Димитров на Кралството Холандија

На првиот ден од работната посета на Кралството Холандија, МНР Никола Димитров оствари средба со Генералниот директор на Организацијата за забрана на хемиско оружје (OPCW), Ахмет Узумџу.

Министерот Димитров на претпладневната средба изрази целосна поддршка за работата на Oрганизацијата – добитник на Нобелова награда за мир во 2013 год. „Го поздравувам вашето лидерство – се’ поважно во овие неизвесни времиња кога рамката на мултилатерализмот е разнишана“- истакна Министерот. На средбата беше разговарано за важните напори кои Организацијата ги презема во насока на имплементација на Конвенцијата за хемиско оружје. Министерот Димитров ја истакна посветеноста на Република Македонија во овој процес изразена и преку нашата актуелна координација на Источноевропската регионална група во Организацијата.

МНР Димитров имаше и обраќање на реномираниот Холандски институт за меѓународни односи – Клингендал. „Актуелниот напредок на реформите во Република Македонија може да има само позитивна корист од примената на Холандската формула заснована на строгост и фер пристап- јасно идентификување на знаци на уназадување и недоволен напредок, но истовремено и вреднување на постигнатото. Искуството со кризата донесе зрелост во нашиот пристап. Не сакаме да станеме ЕУ земја членка само заради членството. Потребен ни е процесот на пристапување, кој што во основа претставува алатка за трансформирање на нашата држава во Европска демократија“.

Работната посета на МНР Димитров во Кралството Холандија продолжува утре со средби со министерот за надворешни работи на Холандија, Стеф Блок, обраќање пред членовите на Комисијата за европски прашања во Парламентот на Холандија, како и средби во Министерството за одбрана и холандското МНР.