28/03/2024
Македонија

Акциска контрола во угостителски објекти и казина, три лица приведени, пронајдена дрога, констатирани неправилности

Ноќва (02.04.2023) во периодот од 00.00 до 04.00 часот од страна на секторите за внатрешни работи и патролни тимови составени од полициски службеници од Одделот за униформирана полиција во координација со инспектори од државните инспекторати и Управата за јавни приходи, спроведена е акциска контрола во угостителски објекти, казина и обложувалници на територијата на цела држава.

При контролата, со која беа опфатени 290 угостителски објекти, казина и обложувалници на триесетина локации во државата, приведени се три лица. Кај едно од нив, на подрачјето на Скопје, се пронајдени 7 пакувања со марихуана и против него ќе следува поднесок за сторено кривично дело по член 215 од Кривичниот законик. На подрачјето на Скопје се приведени и двете други лица, од кои едното по член 80 од Законот за оружје, а другото поради точење на алкохол на малолетници, по член 204 од Кривичниот законик.

За време на контролата констатирани се два прекршока од Законот за приватно обезбедување и два по Законот за прекршоци против јавниот ред и мир, а еден по Законот за лична карта. Од страна на Управата за јавни приходи во две казина се затекнати малолетници, спротивно Законот за игри на среќа, а во два угостителски објекта и две казина од страна на Државниот инспекторат за труд се констатирани неправилности по Законот за инспекција на трудот. Од страна на Државниот пазарен инспекторат, пак, во еден објект е констатиран прекршок по Законот за заштита од пушење. Против одговорните лица ќе следуваат соодветни поднесоци. Акциските контроли во угостителски објекти и казина ќе продолжат и во наредните денови.