Филмот „Дедо и внук“ ќе се прикажува во НУ Центар за култура „Браќа Миладиновци“ во Струга на 17-ти и 18-ти септември

Во НУ Центар за култура „Браќа Миладиновци“ во Струга на 17-ти и 18-ти септември 2021 година ќе се прикажува филмот „Дедо и внук“.

Режисерот Пиперкоски, кој го напиша и сценариото за филмот, раскажува прекрасна приказна, со која сите гледачи ќе можат длабоко да се идентификуваат – проблемите со здравството, политиката, корупцијата, но и обичните човечки приказни и односи момче-девојка, татко-син и дедо-внук.

Филмот ја раскажува приказната по смртта на еден млад пациент, во која младиот доктор Никола се обидува да направи ред во својот живот и оди на посета кај неговиот дедо. Последен пат бил кај него пред 10 години. Ова е филм за конфиликт на генерации, со контраст на морални вредности, моменти за втора шанса.

Во филмот играат: Салаетин Билал, Дејан Лилиќ, Даниела Ивановска, Горан Стојаноски, Благој Веселинов и други актери. Продуцент е Огнен Антов од „Дрим фактори“, во соработка со: „Пандорас бокс продукција“ и „Елиен филм“, и е финансиски помогнат од Агенцијата за филм. Директор на фотографија е романецот Патру Паунеску, сценографијата е на Владимир Зафирковски, костимограф е Жаклина Крстевска, композитор Оливер Тевчев, а монтажата ја направи Данчо Стефков. Филмот е финансиски помогнат од Агенцијата за филм на Република Македонија.