„Финансиските импликации за обезбедување достапни и пристапни специјализирани сервиси за жртви на родово засновано и семејно насилство“

ХЕРА – Асоцијацијата за здравствена едукација и истражување, организираше конференција на која се промовираше Документот за јавни политики: „Кои се инвестициите и минималните стандарди за заштита од родово засновано и семејно насилство?“ и се презентираа наодите од „Методологија за утврдување на трошоците за специјализираните услуги за жени жртви на насилство и на семејно насилство, дефинирање на цените и проценка на цените за шест услуги“, кои беа изработени во соработка со Министерството за труд и социјална политика и граѓанските организации.

За обезбедување сервиси за жртви на насилство, согласно минималните стандарди на Конвенцијата на Советот на Европа за спречување и борба против насилството врз жените и семејното насилство, Република Северна Македонија ја презема обврската да изгради систем на заштита и до 2023 година да:

• воспостави 10 центри за психосоцијално советување на жртви на семејно насилство и за семејствата, во кои ќе бидат вклучени и услуги за советување на сторителите на насилството, како и бесплатна правна помош;
• воспостави 4 кризни центри за жртви на семејно насилство и 4 центри за сместување на жртви на семејно насилство (засолништа), рамномерно распределени по регионите на земјата;
• отвори дополнителни три центри за упатување на жртви на сексуално насилство во рамките на здравствените институции и да воспостави кризни центри за жртви на сексуално насилство раководени од граѓанска организација за советување, терапија;
• обезбедува годишен буџет за одржливост на специјализираните сервиси за жртви на семејно насилство и жртви на сексуално насилство, согласно методологијата за утврдување на трошоците за специјализираните услуги;
• изготви и усвои минимални стандарди за специјализираните сервиси за жртви родово засновано насилство и семејно насилство, согласно одредбите на Инстанбулската конвенција;
• воспостави систем на социјално договарање согласно социјалната реформа, преку што специјализираните сервиси ќе се раководат од граѓанските организации, согласно одредбите на Инстанбулската конвенција.

  Според направената проценка на трошоци државата, односно Владата и локалната самоуправа треба да обезбедуваат околу 70 милиони денари на годишно ниво за непречена работа на сите специјализирани услуги за заштита од родово заснованото насилство и семејно насилство, кои се планирани во Акцискиот план за спроведување на Истанбулската конвенција 2018-2023.

Панелисти на конференцијата беа министерката за труд и социјална политика Мила Царовска, министерот за здравство Венко Филипче, раководителката на канцеларијата на UN Women Весна Ивановиќ- Кастаред и програмската директорка на ХЕРА Елизабета Божиноска.

Поддршката на оваа активност е во рамките на регионалната програма на UN Women – „Спречување на насилството врз жените и девојките во Западен Балкан и Турција: Спроведување на норми, промена на ставови“, а финансирана од Европската Унија.