Министерството за одбрана започна со исплата на јубилејната награда

Министерството за одбрана донесе одлука за исплата на јубилејната награда согласно член 97 од Колективниот договор потпишан меѓу министерството и репрезентативниот синдикат во 2013 година.

Иако со овој Колективен договор Министерството презело обврска на вработените во МО и АРМ за непрекината работа во ефективно траење од 15 години да им се доделува јубилејна награда во висина на една просечна плата, таа обврска не била исполнета и парите не биле исплатувани. Тоа било причина 700 вработени што ги исполнуваат условите за добивање на јубилејна награда, да го тужат министерството, а за околу 200 тужби е пресудено во корист на тужителите.

За да се исполни обврската кон вработените, но и да се спречи натамошно трошење на пари од буџетот на МО за судски трошоци и трошоци на адвокатите и извршителите (кои изнесуваат околу 30 000 денари по предмет), МО донесе одлука да се изврши исплата на јубилејната награда на сите лица кои, согласно толкувањето на Колективниот договор од страна на правната служба, ги исполнуваат условите за доделување на јубилејната награда.

Право на јубилејна награда имаат 1 800 вработени во МО и АРМ. Исплатата е започната, а ќе биде завршена кон сите 1800 вработени во период од триесеттина дена.

Со оваа одлука на МО вработените ќе го остварат своето право согласно Колективниот договор, без потреба да се покренуваат судски постапки, и ќе се спречи дополнителна штета на буџетот на МО.