Одбележан Денот на царината и 27 годин од постоење на Царинската управа на РСМ

Претседателот на Владата на Република Северна Македонија, Зоран Заев, придружуван од заменик-министерката за финансии Ширет Елези и директорот на Царинската управа на РСМ, Ѓоко Танасовски, денеска учествуваше и се обрати на настан организиран по повод одбележување на Денот на царината и 27 години од постоење на Царинската управа на Република Северна Македонија. 

Во прилог ви го пренесуваме во целост обраќањето на премиерот Заев. 

„Денеска го одбележуваме 14ти април – Денот на царината и 27 години од постоење на Царинската управа на Република Северна Македонија.

Од неколку причини одбележувањето на овој ден е значаен за нашата држава и за граѓаните.

Царинската управа и царинските работници се првиот контакт со нашата земја – тие се лицето на Република Северна Македонија.

Царинското работење е поттик и важен предуслов за унапредување на меѓународната трговија на нашата земја.

Како резултат на посветено и чесно работење Царинската управа се покажа како сериозен и еден од најголемите учесници во полнењето на приходни приливи во Буџетот на нашата држава.

Овие факти сами по себе зборуваат колку значајна е улогата на Царинската Управа во креирањето на економскиот амбиент во државата.

Република Северна Македонија и регионот се соочуваат со предизвик на голем раст на бројот на патници и обем на стока во услови кога има технологија која го менува економското окружување каде делува Царинската управа.

Владата на Република Северна Македонија во креирањето политики ги зема предвид предизвиците како да обезбеди брзо и непречено преку-гранично движење на стоки, патници и транспортни средства.

Царинската управа, заедно со останатите гранични агенции има исклучително важна улога во олеснувањето на трговијата и на патувањата, преку поедноставени, стандардизирани и хармонизирани гранични постапки.

Од овие причини, се јавува потребата – царината да има водечка улога во консолидирањето и понатамошното поедноставување на тековните активности за олеснување и поедноставување на движењето на стоките и патниците преку границите.

На тој начин можат да се потврдат и продолжат значително подобрените добрососедски односи. Токму од тие причини Владата сериозно работи на концептот на заеднички контроли со едно застанување – One stop shop – што треба значително да го подобри и олесни животот на граѓаните и на сите деловни субјекти од двете страни на границата.
Во концептот за модернизирано царинско работење (Smart Borders) е потенцирана улогата на царината како еден од главните поддржувачи на Агендата 2030 на Обединетите нации за одржлив развој. 

Преку создавање на фер услови за сите учесници во царинската постапка преку поедноставени, стандардизирани и хармонизирани постапки, треба да се обезбеди навремена испорака на сите суровини за индустријата, да се намали нефер конкуренцијата во локалните заедници, да се отворат можности за маргинализираните заедници и пристап до нови пазари. Царината треба да создаде транспарентни и предвидливи услови за трговијата, преку олеснување на законската трговија што треба да придонесе за економски раст и развој и создавање на нови работни места дома, во нашата земја.

За да се остварат овие цели, царината треба понатамошно да се развива преку употреба на нови дигитални алатки. 

Во насока на порастот на огромен број на податоци, што треба да се обработуваат, споделуваат и ефикасно анализираат – новиот систем за обработка на царински и акцизни документи е одговор на овие барања. Царинската управа треба да се базира на автоматските процеси за обработка на податоците што треба да придонесе за подобра наплата на приходи, подобра анализа на ризик, поголема безбедност и намалување на ризиците од закани.

Важно е да напоменам дека Владата е целосно посветена на остварувањето на целите и приоритетите на Берлинскиот процес за создавање на регионална економска област на Западен Балкан, зацртани во повеќегодишните акциски цели.

Дозволете ми да изразам голема благодарност до Европската Унија, до земјите членки на Европската Унија, до Светската банка, УСАИД, ГИЗ и ИФЦ за донациите и континуираната поддршка што ни ја пружаат за модернизација и унапредување на царинското работење.

Новата ера на дигитална царина е наша остварлива цел и еден од важните услови за побрз економски раст и развој.

На самиот крај сакам на сите царински работници да ви го честитам одбележувањето на Денот на царината и 27 години постоење на Царинска управа на РСМ и да ви порачам дека како Влада ќе продолжиме со поддршка и промовирање на сите соодветни инструменти, иницијативи и алатки за поддршка на Царинската управа, преку дигитализација, автоматизација, без-хартиено работење и градење на секаков вид на капацитетите.

Преку овие напори, убеден сум дека ќе ги постигнеме нашите заеднички цели.

Почитувани царински работници, нека ви е честит царинскиот празник!“

---

Премиерот Заев по повод Денот на царината: Модерното царинско работење е поттик и важен предуслов за унапредување на меѓународната трговија на земјата

Претседателот на Владата на Република Северна Македонија, Зоран Заев, придружуван од заменичка на министерот за финансии Ширет Елези и директорот на Царинската управа на РСМ, Ѓоко Танасовски, денеска учествуваше и се обрати на настан организиран по повод Денот на царината и 27 години од постоење на Царинската управа на Република Северна Македонија. 

Свечениот настан во Националната Филхармонија во Скопје, го отвори претседателот на Владата на Република Северна Македонија, Зоран Заев кој истакна дека одбележувањето на овој ден е значаен за државата и за граѓаните, бидејќи Царинската управа и царинските работници се првиот контакт со земјата – тие се лицето на Република Северна Македонија, а царинското работење е поттик и важен предуслов за унапредување на меѓународната трговија на земјата. 

Премиерот Заев на царинските службеници им го честита одбележувањето на Денот на Царината и порача дека Владата ќе продолжи со поддршка и промовирање на сите соодветни инструменти, иницијативи и алатки за развој на Царинската управа, преку дигитализација, автоматизација, без-хартиено работење и градење на капацитети.

„Денеска го одбележуваме 14-ти април – Денот на царината и 27 години од постоење на Царинската управа на Република Северна Македонија. Како резултат на посветено и чесно работење Царинската управа се покажа како сериозен и еден од најголемите учесници во полнењето на приходни приливи во Буџетот на нашата држава. Република Северна Македонија и регионот се соочуваат со предизвик на голем раст на бројот на патници и обем на стока во услови кога има технологија која го менува економското окружување каде делува Царинската управа. Владата на Република Северна Македонија во креирањето политики ги зема предвид предизвиците како да обезбеди брзо и непречено преку-гранично движење на стоки, патници и транспортни средства“, рече премиерот Заев. 

Пред присутните се обрати и заменик-министерката за финансии Ширет Елези, која во своето обраќање на царинските службеници им ги честиташе постигнатите резултати и истакна дека министерството за финансии и Царинската управа ќе продолжат во спроведувањето на реформите, бидејќи како што рече, само заедно можат да одговорат на новите предизвици, како резултат на брзата глобализација на трговијата и финансиските системи.

„Креирањето на поволна бизнис клима е клучно за економскиот развој. Нашата работа е да обезбедиме безбеден, праведен и одржлив систем. Тука, една од главните улоги ги има Царинската управа. Една од основните функции на Царинската управа е и зачувување на финансиските интереси на државата, и оваа функција Царинската управа успешно ја реализира. Во 2018 година, вкупните приходи се за 11% поголеми од наплатата што ја реализира Царинската управа. Нашата заложба е негување и унапредување на односите со деловната заедница, во насока на подобрување на услугите за компаниите“, истакна заменик-министерката за финансии Елези. 

Директорот на Царинската управа, г-дин Ѓоко Танасоски, во своето обраќање упати честитки до царинските службеници, при што даде осврт на резултатите и активностите на Царинската управа во текот на изминатата година.

„Годинава, Царинската управа посвети повеќе внимание на најзначајниот и најкомплексниот развоен проект наречен Дигитална царина и ако лани најавивме дигитализација, оваа година не очекува реализација, 2018 година ја обележаа неколку крупни проекти од различни области, кои доведоа до огромен напредок и модернизација“, подвлече директорот Танасовски. 

Во рамки на овогодинешното одбележување на царинскиот празник и како дел од подготовките за влез во Европската унија, презентирано беше видео на кое се претставија придобивките од воведувањето на новиот Систем за обработка на царински декларации и акцизни документи. Покрај ова, присутните имаа можност да погледнат и видео во кое беа претставени спецификите на неколку царински постапки, што се применуваат при увоз, извоз и транзит на стоки од и во државата.

На традиционалната свечена церемонија за денот на Царината беше искажана благодарност на институции и поединци кои со својата работа дадоа придонес за успешната работа на Царинската управа и поддршка на реформите во царинското работење. Од името на Царинската управа, директорот Танасоски додели признанија во вид на плакета и пофалница на царинските службеници и компании со кои соработува Царинската управа за постигнати исклучителни резултати во работењето, со што придонесуваат кон порационално, поефикасно и поквалитетно работење.