29/03/2024
Македонија

Премиерот Заев на средба со претставници на КФВ банката за поддршка на развојот

Претседателот на Владата на Република Македонија Зоран Заев, денеска во својот кабинет ја прими делегацијата од банката КФВ за поддршка на развојни проекти во сопственост на германската влада, предводена од Кристоф Дискенс, директор на групацијата за Југоисточна Европа и Турција. На средбата присуствуваше германскиот амбасадор Томас Гериберих и заменик амбасадорот на Сојузна Република Германија во Република Македонија, Марко Акватичи, како и советникот за економија на премиерот, проф. д-р Ванчо Узунов.

На средбата, претставниците од банката КФВ го информираа премиерот Заев за тековните проекти кои се реализираа во Република Македонија со поддршка на банката, во однос на водоводните системи, пречистителни станици, како и на други инфраструктурни проекти.

Во фокус на средбата беше можноста за воспоставување на систем за централно греење во Битола, односно изградба на цевковод од РЕК Битола до градот, со што, во првата фаза на овој проект, ќе се воведе централно греење во јавните социјални и образовани институции како градинки, училишта и болници.

На средбата, исто така, премиерот Заев, истакна дека Владата на Република Македонија е отворена за соработка со германската владина финансиска групација КФВ за изградба на канализациони системи, во помалите и поголеми рурални средини во земјата.

Премиерот Заев, на средбата истакна дека развојните проекти што ги поддржуваат програмите на оваа банка се инвестиции кои имаат потенцијал да го зајакнат и зголемат бруто домашниот производ и дека овие проекти се секогаш во интерес на граѓаните, и дека, во крајна линија, ќе придонесат за заштеда во домашните буџети.