Свечена заклетва на 33 генерација на доброволно служење во АРМ

Денеска во Центарот за индивидуална обука во Касарната „Алекса Демниевски Бауман“ во Велес, се одржа свеченост на која седумдесет и седум граѓани од кои осум жени, дадоа заклетва за доброволно служење на воениот рок во Армијата на Република Македонија.

На свечената заклетва присуствуваше и Државниот секретар во Министерството за одбрана, Драган Николиќ кој се обрати на новите војници и им ја честита дадената заклетва на војниците посакувајќи им успех во обуката во редовите на АРМ. Воедно им порача дека воената професија е предизвик, чест и гордост за младиот човек и дека нивната задача е да научат што е можно повеќе од тајните на воената вештина.

Директорот на ГШ на АРМ, генерал-мајор Димче Петровски во своето обраќање посочи дека со служење на воениот рок се отвора можноста за надградба во воената професија и се креира база за понатамошна селекција во професионалниот состав на Армијата на Република Македонија.

На денешната свеченост во Касарната присуствуваа и заменикот командант на ЗОК, бригадниот генерал Павле Арсовски, командантот на Командата за обука и доктрини, полковник Љубенчо Петровски, претставници на локалната самоуправа, роднини и пријатели на новите војници.

Војниците од 33 генерација на доброволно служење во АРМ во наредниот период од три месеци ќе стекнуваат знаења и вештини од основната воена обука во Центарот за индивидуална обука.