Доделени сертификати за успешно завршена Бреинобреин програма

04/01/2022

Упорност, искрена посветеност и работа, поддршка од родителите и професионални, креативни тренери беше патот до успехот и целта – завршување на комплетната Бреинобреин едукативна програма во Центарот за развивање животни вештини Бреинобреин – Црвен крст Охрид на единаесеттата генерација на ученици. Тие, на пригодна свеченост, во просториите на Црвен крст Охрид, ги добија меѓународните сертификати за успешно завршена БОБ програма.

Центарот за развивање на животни вештини Бреинобреин – Црвен крст Охрид работи под франшизерство на Бреинобреин академијата од Ченаи, Индија од 2010 година. Во центарот се имплементира едукативна програма преку проверени и признати едукативни техники базирани на Неуро лингвистичко програмирање (НЛП) и Абакус ментална аритметика кои го поттикнуваат мозочниот потенцијал кај деца од 4-14 годишна возраст за стекнување, развивање и потврдување на способностите за концентрација, фотографска меморија, нумерички и вербални способности, способности за учење, креативност и имагинација, лидерство, самодоверба, визуелизација, решавање на проблеми.

Оваа светски призната и докажана програма ја спроведуваат високо професионални тренери со искуство во работа со деца и обучени од страна на меѓународни инструктори.

Бреинобреин програмата во Црвен крст Охрид во моментов ја следат преку 70 деца, а од 20.01.2022 г. започнуваат уписите на нови групи. Сите заинтересирани повеќе информации можат да добијат во просториите на Црвен крст Охрид или на тел. 078 227433.

Овој период тренерите и децата во Бреинобреин-Црвен крст Охрид центарот посветени се на интензивни подготовки за учество на 7-от Меѓународен Бреинобреин натпревар кој ќе се одржи на 29 јануари 2022 г. на онлајн платформа, а учество ќе земат преку 25000 ученици од 75 земји од светот.