Повреден ловец кај скопското село Буковиќ безбедно евакуиран со хеликоптер
Ловец се повреди кај скопското село Буковиќ, на непристапен терен, по што е безбедно евакуиран и со хеликоптер е транспортиран на Ургентниот центар.
Утрово ловец паднал во провалија на многу непристапен терен и се здобил со скршеница на ногата. На помош дошле другите колеги ловци, но повредата била опасна, а теренот непристапен. Се јавиле на 112 во ЦУК – и Системот за управување со кризи за спасување бил покренат. Медицинската екипа за 20-ина минути стигнала на местото, но големиот висок планинки дол бил прооден само за искусни планинари и ловци. Имале околу 200 метри до повредениот ловец со скршеница, а не можеле да стигнат до него.
Телефонски, медицинскиот тим од Итната медицинска помош дава совети, а ловците ги спроведуваа. Го грееле за да не добие хипотермија повредениот, со запалени огнови, ја имобилизирале повредената нога, а потоа го извлекле до попристапно место.
Паралелно, дежурните од 112 во ЦУК, побараа хеликоптер на што од МВР, веднаш одговори. Во паралелна комуникација меѓу ЦУК, МВР и Итната медицинска помош ловците, по извлекувањето на повредениот на попристапно место, почнале да ги сечат високите гранки и грмушки за да може поблизу да пристпи хеликоптерот. Ловечките „фосфорно“ портокалови елеци ги употребиле како маркери за побрзо лоцирање од страна на пилотите кои пристапиле од воздух. Сите координирано ги извршиле постапките за што побрзо, а за оптимално спасување и транспортирање на повредениот до болница.
WebOhrid / 17.12.2023 / ЦУК
