НУ Библиотека „Григор Прличев“ – Охрид ја одбележа 127 годишнината од смртта на Патронот

Со пригодна свеченост НУ Библиотека „Григор Прличев“ – Охрид денеска ја одбележа 127 годишнината од смртта на Патронот – поетот и преродбеник Прличев.

„Годинава се одбележуваат и два јубилеи сврзани со Прличев: 190 години од неговото раѓање и 160 години од издавањето на ненадминатата поема „Сердарот“. Ова е мигот кога може и да соопштиме дека за нашата библиотека изминатата 2019 година беше една од најплодните и најуспешните во поглед на програмските активности, промоциите, соработките и отвореноста кон читателите и посетителите со над 80 организирани и одржани настани. Се надеваме дека и годинава ќе создадеме настани кои ќе останаат во трајната меморија на Охрид,“ – рече м-р Милчо Јованоски, вработен во Библиотеката.

За животот и делото на Прличев – Вториот Хомер со свои лични навраќања кон истражувањата на неговото творештво, нераскинливо врзано за Охрид беседеше проф. д-р Вера Стојчевска – Антиќ.

„Во однос на јазичните прашања имаме спектар на созанија, почнувајќи од фактот дека еден сиромешаен охридски ученик толку добро го совладал грчкиот јазик, што достигнал врв на височината да биде прогласен за добитник на највисоката годишна грчка поетска награда ловроносец- Втор Хомер- за делото „Сердарот“ („О АПМАТΏΛОΣ“) , Атина 1860. Меѓутоа многу бргу се разочарал во сфаќањата на “Гордите Грци“ за непочитувањето на неговиот род, за да се откаже од грчката култура и да пишува на свој дијалект или на така наречениот „општословени“ јазик, кој не доживеал успех. Во секој случај неговиот вистински израз доминира со длабиснкото познавање и усвојување на охридскиот дијалект, на кој јазик најискрено и најсоодветно пишувал и говорел кога им се обраќа на своите сонародници. Мошне значаен момент за неговиот однос и мислење кон јазикот претставува неговото писмо упатено до бугарскиот критичар Нешо Бончев. Приличев му го испратил за објавување преводот на „Илијадата“. Бончев го одбил текстот и му ги истакнал писмено грешките. Прличев бил навреден и меѓу другото му одговара на критичарот :„…Вие не требаше да набројувате толку мниогу грешки. Требаше да напишете само „Григор Приличев не го знае бугарскиот (литературен) јазик.“ Сметам дека поточен одговот за Бугарите од овој што го наведуваме нема, зашто Григор Прличев беспрекорно го знаел до совршенство својот охридски јазичен дијалект научен од неговата сакана и намачена мајка,“ – рече д-р Стојчевска – Антиќ.

Денеска беше промовиран и Каталогот на стари и ретки книги – од група вработени во библиотеката. Промоторот Богомир Наумоски, библиотекар – советник од Струга го потенцира следново: „Каталогот содржи вкупно 127 наслови на скенирани монографски публикации издадени во периодот од 1872 до 1945 година. Заради познатите историски констелации во назначениот период публикациите застапени во каталогот се издадени надвор од Македонија односно во разни градови на Балканот и пошироко. Најстара публикација во библиотеката е книгата „Општа историја књижевности “ од познатиот лингвист и книжевен теоретичар Јохан Шер издадена во Белград во 1872 година,“ рече Богомир Наумоски.

Д-р Наде Караџовска, библиотекарски советник од Прилеп ја промовираше книгата „Библиотеката како медиум за комуникација“ од м-р Мариче Боздоганова, библиотекар – советник, вработена во библиотеката во Охрид. Според Караџова книгата ги обработува современите трендови во библиотекарството , со што библиотекарите и читателите ќе бидат побогати за уште едно дело преку кое ќе се подигне заемната комуникација на повисоко ниво.

Директорката на библиотеката Гордана Змејковска на проф. на д-р Вера Стојчевска – Антиќ и додели специјална благодарница со која НУ Библиотека „Григор Прличев“ ја прогласи за нејзин почесен член.

На настанот во библиотеката присуствуваше и внуката на Прличев, Олга Прличева. Таа на библиотеката и подари портрет на Прличев, а библиотеката и возврати со подарок – книга со фотографии од Охрид – собрани од академик Миле Миќуновиќ.

Свеченоста на радост на присутните започна со настапот на таткото и синот Михаил и Иван Мишеви кои ја изведоа Прличевата „1762 лето“.

Манифестацијата „Прличеви беседи“ библиотеката ја организира во соработка со Министерството за култура и Општина Охрид.

This slideshow requires JavaScript.