СВР Охрид апелира на внимателно возење поради снежните врнежи

СВР Охрид ги известува возачите на патнички и други моторни возила дека, сообраќајот на патниот правец Охрид-Кичево (автопат во изградба) се одвива нормално, но со намален интензитет во двете насоки и без застој, додека, на патниот правец Кичево-планински превој „Стража“, сообраќајот, поради обилни снежни врнежи, се одвива отежнато и по една сообраќајна лента. На овој патен потег, на сила е забрана за движење на тешки товарни моторни возила.

Патните правци Струга-граничен премин Ќафасан и Струга-Дебар, се проодни, нема застој или други ограничувања, а интензитетот на патниот сообраќај е умерен.

Полициските службеници се на терен и преземаат мерки за безбедно одвивање на сообраќајот посебно на патниот правец Кичево-Стража.

СВР Охрид, ги информира возачите на моторни возила дека е потребно, да извршат дислокација на своите возила паркирани на булеварот „Туристичка“ и на другите пофрекфентни сообраќајници во Охрид, со цел да им овозможат на возилата од јавните претпријатија да извршат целосно чистење на коловозите од снежните наноси.

СВР Охрид апелира до возачите на моторни возила, на крајна внимателност при управување со моторните возила по патиштата и почитување на насоките на полициските службеници.

WebOhrid / 25.11.2023 / СВР Охрид